Fjölskylduhjúkrun á Barnaspítala Hringsins, aðlögunarleiðir og lífsgæði foreldra. Þversniðsrannsókn

Rannsóknir hafa sýnt að sjúkrahúsinnlagnir barna, skipulagðar eða óvæntar, valda álagi í fjölskyldum. Á Barnaspítala Hringsins hefur verið innleidd fjölskylduhjúkrun sem felst í stuttum meðferðarsamtölum við fjölskyldur. Aðferðin byggir á hugmyndafræði Calgary- fjölskylduhjúkrunar. Markmiðið var að auka gæði hjúkrunar fyrir börn og fjölskyldur þeirra. 
\nTilgangur þessarar rannsóknar var að kanna upplifun foreldra á Barnaspítala Hringsins af stuðningi og fræðslu frá hjúkrunarfræðingum, auk þess að kanna aðlögunarleiðir og heilsutengd lífsgæði foreldra. 
\nRannsóknarsniðið er megindlegt lýsandi þverskurðarsnið. Þátttakendur voru þægindaúrtak foreldra 123 barna sem fengu heilbrigðisþjónustu á BH. Svörun var 49% (n=60). Við gagnaúrvinnslu var notuð lýsandi- og ályktunartölfræði. Foreldrarnir svöruðu þremur spurningalistum um: stuðning og fræðslu hjúkrunarfræðinga við fjölskyldur, aðlögunarleiðir foreldra og lífsgæði fjölskyldunnar. 
\nHelstu niðurstöður eru þær að foreldrar barna með langvinn veikindi upplifa marktækt betri heildarstuðning og hugrænan stuðning en foreldrar barna með skemmri veikindi. Foreldrar sem höfðu fengið fræðslu um sjúkdóm barns upplifðu marktækt betri heildarstuðning, tilfinningalegan og hugrænan stuðning samanborið við hina er ekki höfðu fengið fræðslu. Foreldrar sem glíma sjálfir við alvarleg veikindi, eða aðrir í þeirra fjölskyldu, upplifa marktækt verri heildarstuðning, tilfinningalegan stuðning, sem og marktækt verri fjölskyldusambönd en þar sem engin annar er veikur. Foreldrar sem hafa verið oftar en einu sinni með barnið sitt á sjúkrahúsinu höfðu marktækt meiri áhyggjur af barninu en hinir sem eru þar í fyrsta sinn. Einstæðir foreldrar meta félagslega líðan sína marktækt verri en giftir foreldrar. Foreldrar sem höfðu þörf fyrir stuðning frá fagfólki mátu marktækt verri tilfinningalega líðan sína og höfðu meiri áhyggjur af barninu en hinir sem þurfa ekki á stuðning að halda. 
\nRannsóknarniðurstöðurnar gefa hjúkrunarfræðingum á barnasviði tilefni til að álykta að fræðsla til foreldra barna á spítalanum, hafi áhrif á og bæti upplifun foreldra af stuðningi. Einnig má álykta að sérstaklega þurfi að hlúa að foreldrum barna þar sem veikindi eru þegar til staðar í fjölskyldunni. Jafnframt að tilfinningaleg líðan og áhyggjur foreldra hafi áhrif á þörf þeirra fyrir stuðning frá fagfólki. 
\n
\n Lykilorð: Foreldrar, börn, sjúkrahúsinnlögn, barnahjúkrun, fjölskyldu-hjúkrun, fjölskyldustuðningur, aðlögunarleiðir og heilsutengd lífsgæði.

Récupéré en direct depuis OpenAlex et désinversé. Les résumés ne sont pas conservés dans cette base de données : les index inversés représentent 8,6 Go des 9,3 Go de texte de la base, et le serveur dispose de 13 Go libres.