„Staðurinn skiptir ekki máli... bara ef ég hefði rétta fólkið með mér.“ Reynsla kvenna sem flytjast milli fæðingarstaða í fæðingu: Eigindleg fyrirbærafræðileg rannsókn.

Síðan fyrir aldarmót hefur fæðingarstöðum á Íslandi fækkað gríðarlega. Samhliða þeirri fækkun hefur þjónustustig fæðingarstaða lækkað vegna lokana á skurðstofuþjónustu á heilbrigðisstofnunum utan höfuðborgarsvæðisins. Til þess getur komið að konur þurfi flutning í fæðingu á fæðingarstað með hærra þjónustustigi sem getur haft áhrif á upplifun þeirra og líðan. Í þessari rannsókn var leitast við að svara eftirfarandi rannsóknarspurningu: Hver er upplifun kvenna sem flytjast milli fæðingarstaða í fæðingu?
\nAðferðafræði rannsóknarinnar er eigindleg og byggist gagnaöflun á viðtölum við sjö konur, frumbyrjur og fjölbyrjur, sem hafa þurft flutning á milli fæðingarstaða í fæðingu. Þátttakenda var aflað með aðstoð yfirljósmæðra á þeim fæðingarstöðum sem konurnar áætluðu að fæða á. Viðtölin voru greind með aðferð Vancouver-skólans í fyrirbærafræði.
\n Niðurstöður leiddu í ljós að það var ekki staðurinn heldur stuðningur ljósmóður sem var þungamiðjan í upplifun kvennanna sem lýsti sér í undirstöðuþemanu Staðurinn skiptir ekki máli ... bara ef ég hefði rétta fólkið með mér. Þrjú yfirþemu voru greind: Ákvörðunin var að lokum mín, Breyting á áætlun og Litið til baka. Undir þeim komu í ljós samtals sjö undirþemu. Greiningarlíkan hefði mátt setja upp í einfalda mynd sem ferðalag frá A til B, á einum ás en þegar upplifun, tilfinningar og líðan hverrar konu er skoðuð sem hluti af flutningnum verður myndin flóknari og eins konar hringferð.
\nNiðurstöður rannsóknarinnar eru í samræmi við rannsóknir sem gerðar hafa verið á viðfangsefninu erlendis. Mikilvægt er að skoða vinnuferli vegna flutnings frá fæðingarstöðum með fyrsta stigs þjónustu, huga að upplýsingum um undirbúning og um leið mæta konum þar sem þær eru staddar, mæta þörfum þeirra og mynda við þær gott meðferðarsamband. Með því er lagður grunnur að jákvæðari fæðingarupplifun þeirra kvenna sem flytjast milli fæðingarstaða. Til að kortleggja betur reynslu og þarfir þessa hóps er frekari rannsókna þörf meðal annars til að skoða útkomu fæðinga og langtímaáhrif með megindlegum aðferðum.
\n
\nLykilorð: fæðingarupplifun, flutningur í fæðingu, stuðningur ljósmóður, ákvarðanataka

Récupéré en direct depuis OpenAlex et désinversé. Les résumés ne sont pas conservés dans cette base de données : les index inversés représentent 8,6 Go des 9,3 Go de texte de la base, et le serveur dispose de 13 Go libres.