Ávinningur af stuttum fjölskyldumeðferðarsamræðum við foreldra barna, eins árs og yngri, sem greinast með RS veiru á Bráðamóttöku barna

Í rannsóknum á börnum með berkjungabólgu af völdum RS veirunnar (respiratory syncytial virus), hefur komið fram að veiran getur haft áhrif á öndunarfæri þeirra öll æskuárin í formi sogöndunar, astma og ofnæmis. Rannsóknir á foreldrum þessara barna gefa vísbendingar um að veikindin séu þeim erfið og að þau þurfi faglegan stuðning. \n \nTilgangur þessarar rannsóknar var að meta hvort stuttar fjölskyldumeðferðarsamræður, veittar af hjúkrunarfræðingi, veiti foreldrum tilfinningu fyrir auknum stuðningi á veikindatímabili barna þeirra miðað við foreldra sem fá hefðbundna hjúkrunarmeðferð. Meðferðarsamræðurnar eru byggðar á hugmyndafræði Calgary- fjölskylduhjúkrunarlíkana sem þróuð hafa verið í þrjá áratugi. Foreldrum barna með berkjungabólgu af völdum RS veirunnar var boðin þátttaka. Skoðað var hvort mæður og feður skynji stuttar fjölskyldumeðferðarsamræður sem styðjandi meðferð. Einnig var skoðað hvort fjölskylduvirkni breytist eftir þátttöku í meðferðarsamræðunum. \n \nÍ þessari megindlegu hjúkrunarmeðferðarrannsókn var notað aðlagað tilraunasnið til að meta áhrif stuttra meðferðarsamræðna á skynjaðan stuðning og fjölskylduvirkni. Þátttakendur voru alls 41, 21 í tilraunahóp (n=21) og 20 í samanburðarhóp (n=20). Þeir svöruðu spurningalista um einkenni barnsins, bakgrunnsþætti fjölskyldunnar, skynjaðan stuðning og fjölskylduvirkni. Tilraunahópurinn fékk inngrip, sem fólst í stuttum fjölskyldumeðferðarsamræðum við hjúkrunarfræðing og að meðaltali 11 dögum seinna svöruðu báðir hóparnir stuðnings- og virknilistanum aftur. Við gagnaúrvinnslu voru gerð kí-kvaðrat próf og dreifigreining fyrir endurteknar mælingar. Miðað var við 95% marktektarmörk. \n \nNiðurstöður sýna marktækan mun á skynjuðum heildarstuðningi sem og hugrænum stuðningi mæðra í tilraunahópi miðað við samanburðarhóp. Niðurstöðurnar styðja því rannsóknartilgáturnar um að stuttar meðferðarsamræður auki tilfinningu fyrir heildarstuðningi og hugrænum stuðningi mæðra barna með berkjungabólgu af völdum RS veirunnar. Niðurstöðurnar sýna einnig kynjamun á skynjuðum stuðningi í tilraunahópi. Mæður skynja marktækt meiri hugrænan stuðning en feður. \n \nRannsóknarniðurstöðurnar gefa hjúkrunarfræðingum á bráðamóttökum fyrir börn, tilefni til að álykta að stuttar meðferðarsamræður styðji mæður ungra barna í veikindum þeirra. \n \nLykilorð: Bráð veikindi, RS veiran, fjölskylda, fjölskylduhjúkrun, meðferðarsamræður, fjölskyldustuðningur og fjölskylduvirkni.

Récupéré en direct depuis OpenAlex et désinversé. Les résumés ne sont pas conservés dans cette base de données : les index inversés représentent 8,6 Go des 9,3 Go de texte de la base, et le serveur dispose de 13 Go libres.