Breytingar þurfa að vera samvinnuverkefni : reynsla millistjórnenda á heilbrigðisstofnunum á landsbyggðinni af því að leiða breytingar

Tilgangur rannsóknarinnar var að auka þekkingu og dýpka skilning á reynslu millistjórnenda á heilbrigðisstofnunum á landsbyggðinni af því að leiða breytingar og af stuðningi og stuðningsleysi í því samhengi. \n \nAðferð. Notuð var fyrirbærafræðileg rannsóknaraðferð, Vancouver-skólinn í fyrirbærafræði. Gögnum var safnað með viðtölum við 12 millistjórnendur á íslenskum heilbrigðisstofnunum á landsbyggðinni sem leitt höfðu breytingar. Margar ástæður voru fyrir breytingunum, svo sem fyrirmæli frá yfirmönnum, verklagsbreytingar, sameiningar stofnana og flutningur á starfsemi starfsstöðva þeirra. \n \nNiðurstöður. Yfirþema rannsóknarinnar og megin niðurstaða er: Breytingar þurfa að vera samvinnuverkefni. Þátttakendum bar saman um að til að leiða breytingar þurfi millistjórnandinn að hafa fólk með sér, hvort sem það eru yfirmenn, undirmenn eða samfélagið. Til að ná þessari samvinnu og fá fólk með sér, skipti stjórnandinn sjálfur miklu máli, menntun hans, þekking, reynsla, kjarkur og áræðni, en einnig sú streita og það álag sem þegar var á stjórnandanum. Eflandi áhrifaþættir í breytingaferlinu voru stuðningur yfirmanna, undirmanna og samfélagsins, ásamt sigrum í breytingaferlinu. Algengasta form stuðnings yfirmanna var virk hlustun og hvatning. Þátttakendur rannsóknarinnar virtust hafa talsvert sjálfstæði í vinnu sinni og voru þakklátir fyrir það. Helstu hindranir í breytingaferlinu voru í tengslum við hraða breytinga, ónógt fjármagn og ósátta undirmenn, sem veittu breytingunum mótspyrnu. Breytingaferlið sjálft markaði reynslu millistjórnendanna og þá helst tilurð breytinganna, undirbúningur stjórnandans og framkvæmd breytingaferlisins, en þátttakendur rannsóknarinnar upplifðu talsverða streitu við að leiða breytingarnar. Að lokum komu fram þættir um það sem betur hefði mátt fara í innleiðingu breytinganna, svo sem skýrari framtíðarsýn fyrir heilbrigðisstofnanir á landsbyggðinni og markviss handleiðsla fyrir millistjórnendur. \n \nÁlyktanir. Rannsóknin veitir fáséða innsýn í reynslu millistjórnenda á heilbrigðisstofnunum á landsbyggðinni. Þróa þyrfti skýrari framtíðarsýn fyrir slíkar stofnanir og fá millistjórnendur með í þá vinnu. Þá er ljóst að millistjórnendur þurfa handleiðslu og stuðning, einkum ef þeir eiga að leiða breytingar. \n \nLykilhugtök: Millistjórnendur, breytingaferli, leiðtogahæfni, fyrirbærafræði, viðtöl. \n

Récupéré en direct depuis OpenAlex et désinversé. Les résumés ne sont pas conservés dans cette base de données : les index inversés représentent 8,6 Go des 9,3 Go de texte de la base, et le serveur dispose de 13 Go libres.