Mikilvægi fjölskyldna við hjúkrun: viðhorf hjúkrunarfræðinga á Sjúkrahúsinu á Akureyri

Bakgrunnur: Veikindi sjúklings geta haft áhrif á alla fjölskylduna og aukið álag innan hennar, en mikilvægt er að horfa á sjúkling og fjölskyldu hans sem eina heild. Rannsóknir hafa sýnt að fjölskyldumiðuð hjúkrun geti skilað miklum ávinningi fyrir sjúklinginn, fjölskyldu hans og hjúkrunarfræðinga. Fjölskylduhjúkrun getur bætt gæði hjúkrunar, stuðning og fræðslu til fjölskyldu sjúklings. Einnig getur hún veitt fjölskyldu aukið hlutverk, stytt tíma innlagnar sjúklings og dregið úr líkum á endurinnlögn. Gæði fjölskylduhjúkrunar endurspeglast í viðhorfi hjúkrunarfræðinga, en jákvætt viðhorf eykur þátttöku fjölskyldunnar í fjölskylduhjúkrun. Hjúkrunarfræðingar með aukna starfsreynslu og hærra menntunarstig eru líklegri til að hafa jákvætt viðhorf til fjölskyldumiðaðrar hjúkrunar og getur það tengst þekkingu, þjálfun, bakgrunni og reynslu þeirra í starfi. \nTilgangur rannsóknarinnar er að kanna viðhorf hjúkrunarfræðinga og ljósmæðra til fjölskylduhjúkrunar á Sjúkrahúsinu á Akureyri (SAk). Þá er markmiðið einnig að skoða hvort viðhorf þeirra hafi breyst eftir innleiðingu á Calgary-fjölskylduhjúkrunarlíkaninu. Þannig verða skoðuð viðhorf og upplifanir hjúkrunarfræðinga og ljósmæðra í stöðu tengiliða á innleiðingardeildum. \nAðferð: Notast var við bæði eigindlega og megindlega rannsóknaraðferð. Gerð var íhlutunarrannsókn án samanburðarhóps með samanburði á viðhorfi hjúkrunarfræðinga (FINC-NA spurningarlistinn) fyrir og eftir íhlutun sem var innleiðing fjölskylduhjúkrunar. Úrtakið var hjúkrunarfræðingar og ljósmæður af innleiðingardeildum SAk. Á tíma 1 svöruðu 133 þátttakendur (92%) og á tíma 3 svöruðu 129 (80%). Eigindlegi hlutinn fór fram með hálfstöðluðum viðtölum við 9 hjúkrunarfræðinga sem voru tengiliðir á innleiðingardeildum. Úrvinnsla megindlegra gagna fór fram í SPSS og úrvinnsla eigindlegra gagna með innihaldsgreiningu. \nNiðurstöður megindlegu rannsóknarinnar sýna að innleiðing fjölskylduhjúkrunar á SAk hafði jákvæð áhrif á viðhorf hjúkrunarfræðinga. Marktækur munur var á viðhorfum þátttakenda fyrir og eftir innleiðingu fjölskylduhjúkrunar nema í einum þætti (p<0,05). Í eigindlega þætti rannsóknarinnar upplifðu tengiliðir fjölskylduhjúkrunar að helstu hindrandi þættir við innleiðingu fjölskylduhjúkrunar væru tímaskortur, álag, mannekla og óöryggi. Einnig var nefndur skortur á klínískri þjálfun og fræðslu. Helstu hvetjandi þættir voru endurmenntun hjúkrunarfræðinga, skýr stefna og verklag deilda, góð mönnun og stuðningur á deild. \nÁlyktun: Innleiðing fjölskylduhjúkrunar á SAk var árangursrík. Til að viðhalda þessum góða árangri og auka öryggi hjúkrunarfræðinga í starfi má ekki slaka á stuðningi við starfsfólk þrátt fyrir að innleiðingu sé lokið. Það getur skilað sér í bættri þjónustu til sjúklinga og fjölskyldna þeirra sem og jákvæðari upplifun hjúkrunarfræðinga í starfi. \n \nLykilorð: Fjölskylduhjúkrun, Viðhorf hjúkrunarfræðinga, Calgary fjölskyldumats- og meðferðarlíkanið

Récupéré en direct depuis OpenAlex et désinversé. Les résumés ne sont pas conservés dans cette base de données : les index inversés représentent 8,6 Go des 9,3 Go de texte de la base, et le serveur dispose de 13 Go libres.