Aðalmálið að maður hlúi að sjálfum sér : reynsla hjúkrunardeildarstjóra af álagi og áskorunum í starfi og bjargráðum í því samhengi

Hjúkrunardeildarstjórar á Íslandi starfa við aðstæður sem einkennast af kröfum um öryggi og gæði heilbrigðisþjónustu, samhliða atgervisflótta hjúkrunarfagfólks. Lítil athygli er á þætti sem geta verið þeim bjargráð og stuðningur. Fyrri rannsóknir benda til að stuðningur næstu yfirmanna er oft takmarkaður. Hérlendis og erlendis liggur fyrir lítil gagnreynd þekking um reynslu hjúkrunardeildarstjóra og bjargráð við krefjandi aðstæður. Mikilvægt er að varpa ljósi á efnið þar sem hjúkrunardeildarstjórar eru þýðingarmikill hlekkur í skipulagi og árangri heilbrigðisstofnana. Með fyrirbærafræðilegri aðferð Vancouver-skólans voru tekin hálfstöðluð viðtöl við sextán hjúkrunardeildarstjóra sem störfuðu innan heilbrigðisstofnana á Íslandi vorið 2018, í þeim tilgangi að auka þekkingu á reynslu hjúkrunardeildarstjóra á Íslandi af álagi og áskorunum í starfi og bjargráðum í því samhengi. 
\nNiðurstöður komu fram í fjórum meginþemum. Maður fer aldrei úr þessari kápu vísar til starfs hjúkrunardeildarstjóranna sem þær sögðu umfangsmikið og ábyrgðina takmarkalausa. Þú ræður eiginlega ekki þó þú ráðir vísar til starfsumhverfis þeirra, þar sem þær ráða starfinu en ráða þó litlu um eðli og ákvarðanir yfirstjórnenda. Það sést þegar manni líður vel vísar til líðanar í starfi, sem er ýmist vellíðan og sátt í starfi eða örmögnun og ósátt. Maður þarf að vera viðbúin hreinlega öllu vísar til reynslu hjúkrunardeildarstjóranna af bjargráðum til að takast á við starfið. Undirstöðubjargráðið endurspeglast í meginniðurstöðu rannsóknarinnar; að aðalmálið er að hlúa að sjálfum sér. Niðurstöður rannsóknarinnar eru í samræmi við fyrirliggjandi þekkingu á sviðinu, en nýmæli rannsóknarinnar er reynsla hjúkrunardeildarstjóranna af mikilvægi þess að annast um sjálfa sig til að geta tekist á við krefjandi aðstæður í starfi. 
\nNiðurstöðurnar fela í sér vísbendingar um að með tileinkun bjargráða sem fela einkanlega í sér að hlúa að sér, er mögulegt að öðlast sátt, ná árangri og líða vel í starfi sem krefst mikils á sama tíma og það gefur mikið.
\nLykilorð: Hjúkrunardeildarstjóri, álag, áskoranir, bjargráð.

Récupéré en direct depuis OpenAlex et désinversé. Les résumés ne sont pas conservés dans cette base de données : les index inversés représentent 8,6 Go des 9,3 Go de texte de la base, et le serveur dispose de 13 Go libres.