Að fara úr virkum lífsstíl í félagslega einangrun og aftur til baka : áhrif heilahristings af völdum höfuðáverka í íþróttum á sálfélagslega líðan íþróttafólks

Heilahristingur af völdum höfuðáverka er tiltölulega algengur hjá íþróttafólki og hafa áhrifin komið betur og betur í ljós síðustu ár. Síðustu 20 ár hefur ákveðin vitundarvakning orðið innan íþróttaheimsins hvað varðar heilahristing en aðallega hafa líkamleg áhrif þess á íþróttafólk verið skoðuð en minna um áhrif á sálræna líðan en það hefur verið að breytast upp á síðkastið. Tilgangurinn með þessari rannsókn er að öðlast dýpri þekkingu og skilning á sálfélagslegum áhrifum heilahristings af völdum höfuðáverka á íþróttafólk sem getur leitt til aukinnar þekkingar fólks á fyrirbærinu, þá sérstaklega starfsfólks sem vinnur í kringum íþróttalið og íþróttafólk. 
\nRannsóknarspurningin er: Hver er reynsla íþróttakvenna af áhrifum heilahristings af völdum höfuðáverka á sálfélagslega líðan, endurhæfingu og viðbrögðum og almennri þekkingu fólks. Stuðst var við eigindlega aðferðafræði, Vancouver skólans í fyrirbærafræði. Tekin voru djúpviðtöl við þrjár íþróttakonur sem höfðu fengið heilahristing af völdum höfuðáverka í sinni íþrótt og gengið í gegnum endurhæfingu í kjölfarið. Niðurstöður leiddu í ljós að þátttakendur fundu fyrir sálfélagslegum einkennum í kjölfar einangrunar og annarra takmarkana vegna líkamlegra einkenna heilahristings. Skyndilegar breytingar urðu á lífi þeirra og áttu þær í erfiðleikum með að fara úr mjög virkum lífsstíl yfir í nánast algjöra einangrun vegna ljósfælni, svima, sjóntruflana, höfuðverkja og þreytu sem hélt þeim frá því að umgangast annað fólk. Einangrunin leiddi til mikillar vanlíðunar og vonleysis. Þátttakendur fundu einnig fyrir mikilli óvissu og kvíða á endurhæfingartímabilinu þar sem þær vissu ekki hvert þær áttu að leita og vissu ekki hvernig endurhæfingartímabilið liti út né hversu langan tíma það myndi taka. Skortur er á meðferðarúrræðum fyrir íþróttafólk sem fær heilahristing sem býður upp á markvisst endurhæfingarferli. Samanborið við önnur lönd, t.d. Bandaríkin, er Ísland eftir á hvað varðar meðferðarúrræði fyrir íþróttafólk og er þörf á að auka þekkingu fagaðila sem starfa með íþróttafólki og auka valmöguleika á meðferðarúrræðum. Lítil áhersla var lögð á sálfélagslega líðan þátttakenda í endurhæfingunni en fyrri rannsóknir hafa sýnt fram á mikilvægi hlutverks sálfræðinga hjá íþróttafólki sem þarf að ganga í gegnum miklar breytingar á daglegu lífi sínu vegna heilahristings.
\n
\nLykilhugtök: Heilahristingur, sálfélagsleg einkenni, einangrun, endurhæfing, viðtöl

Fetched live from OpenAlex and de-inverted. Abstracts are not stored in this database: the inverted indexes are 8.6 GB of the frame’s 9.3 GB of text, and the host has 13 GB free.