„Besta ákvörðun sem ég hef tekið var að skipta um skóla“ Upplifun ungmenna sem hafa skipt um framhaldsskóla, skólaval og viðhorf til framhaldsskóla

Markmið þessarar ritgerðar var að fá innsýn í val ungmenna, sem skiptu um skóla á framhaldsskólastiginu, á skóla og skoða hverja þau töldu hafa verið helstu þættina sem höfðu áhrif á valið. Einnig var lögð áhersla á að varpa ljósi á mögulegar ástæður fyrir því að þau skiptu um skóla, hver upplifun þeirra var af skólaskiptunum og að skoða reynslu ungmennanna af skólunum sem þau völdu og sóttu. Rannsóknin var unnin með eigindlegri rannsóknaraðferð og byggir á viðtölum við átta ungmenni. Niðurstöður rannsóknarinnar sýndu fram á ýmsa þætti sem ungmennin töldu að hefðu skipt miklu um val þeirra á skóla. Skýrt munstur var á því hvort skólavalið væri út frá skóla eða námsbraut. Helmingurinn virtist frekar hafa valið sér nám út frá skóla en þeir nemendur sem völdu skóla út frá námi voru annað hvort að velja listnám eða tengt þeirri íþrótt sem þeir stunduðu. Þeir þættir sem virtust hafa áhrif á skólaval viðmælenda var vinir og jafnaldrar, úr bæði grunnskóla og þeim íþróttum sem þeir stunduðu, nálægð skólans við heimili og námsframboð. Skólaskipti virtust helst verða hjá viðmælendum þegar áhugi þeirra á námi fór dvínandi eða vegna vilja þeirra til að skipta um námsbraut. Áhrif foreldra komu helst fram þegar viðmælendur vildu skipta úr fyrsta framhaldsskólanum sem þeir höfðu sótt við lok grunnskóla. Foreldrar hvöttu ungmennin þá frekar til að skipta um skóla heldur en að hætta í námi. Einnig sýndu niðurstöður fram á sterk viðhorf viðmælenda til framhaldsskóla bæði þeirra sem þeir höfðu sótt og annarra í samfélaginu og það hafði jafnframt áhrif bæði á val þeirra á framhaldsskóla og á skólaskipti þeirra. Vonast er til að niðurstöðurnar verði gagnlegar bæði fyrir náms- og starfsráðgjafa sem og annað starfsfólk innan skólasamfélagsins. Að þær auki skilning á hvernig nemendur framkvæma skólaval sitt og þeim ástæðum sem geta ýtt undir ákvörðun ungmenna um að skipta um skóla. Með aukinn skilning í farteskinu væri hægt að aðstoða nemendur enn frekar við skólaval þeirra á framhaldsskólastigi með áhuga þeirra á námi sem leiðarljós, ásamt því að styðja nemendur þannig að ávinningur þeirra af skólaskiptunum yrði í forgangi.

Fetched live from OpenAlex and de-inverted. Abstracts are not stored in this database: the inverted indexes are 8.6 GB of the frame’s 9.3 GB of text, and the host has 13 GB free.