Fjölþættur vandi barna: Baráttan um úrræði

Aukin umræða hefur verið undanfarin ár á starfsvettvangi fagaðila sem vinna að málefnum barna sem glíma við fjölþættan vanda. Þessi rannsókn er sú fyrsta sinnar tegundar hér á landi með það meginmarkmið að fjalla um málefni þessara barna út frá sjónarhorni barnaverndarstarstarfsmanna. Rannsóknin hefur hagnýtt gildi og geta niðurstöður bætt þekkingu á þeim kerfislæga vanda sem við er að glíma í þessum málaflokki og stuðlað að bættri þjónustu við börn og fjölskyldur þeirra. Tilgangur rannsóknarinnar er því að skilgreina hugtakið fjölþættur vandi, greina ákvarðanatökuferlið og skoða hvernig samvinnu er háttað við aðrar stofnanir í því ferli. Í rannsókninni var beitt eigindlegum rannsóknaraðferðum þar sem tekið var eitt rýnihópaviðtal og fimm eigindleg viðtöl. Fyrirbærafræðileg nálgun var notuð við greiningu gagna, þar sem sérstaklega var stuðst við Vancouver-skólann. Niðurstöður rannsóknarinnar benda til þess að ekki sé notuð stöðluð skilgreining á fjölþættum vanda hjá barnaverndarnefndum. Þær sýna að einstaklingur með fjölþættan vanda er skilgreindur þannig að hann glími við geðraskanir, þroskaraskanir og hegðunarvanda og þurfi því stuðning frá fleiri en einu kerfi. Vísbendingar eru um að þessi mál séu með þeim þyngstu sem barnaverndarnefndir fást við, og þá sérstaklega ef barnið glímir einnig við vímuefnavanda. Barnaverndarnefndir nýta sér í auknum mæli einkarekin úrræði vegna skorts á viðeigandi úrræðum á vegum ríkis og sveitarfélaga fyrir börn með fjölþættan vanda. Ákvarðanatökur í þessum málum geta reynst erfiðar vegna úrræðaleysis og fjárskorts í heilbrigðis- og félagsmálakerfinu. Þessir þættir koma niður á starfsemi barnaverndarnefnda með þeim afleiðingum að úrræðaleit verður erfið. Þar af leiðandi myndast togstreita milli þeirra stofnana sem koma að máli barnsins sem eru oftast nær barnaverndarnefnd og barna- og unglingageðdeild. Niðurstöður sýna að samvinna barnaverndarstarfsmanna í þessum málum felst í því að vinna með öðrum stofnunum og fagaðilum sem veita þessum börnum þjónustu, auk barnsins og foreldrum þess. Ýmsar vísbendingar eru um að samvinna og þverfaglegt samstarf gangi betur í smærri sveitarfélögum þar sem meiri nálægð er á milli stofnana og fagaðila. \nEfnisorð: Félagsráðgjöf, fjölþættur vandi, barnavernd, ákvarðanatökuferli.

Fetched live from OpenAlex and de-inverted. Abstracts are not stored in this database: the inverted indexes are 8.6 GB of the frame’s 9.3 GB of text, and the host has 13 GB free.